عــوده لمدونتي الحبيبه  

مرسلة بواسطة Abd-Alrahman





في البدايه يا جماعه إنتوا وحشتوني جدا جدا



يارب تكونوا بخير وفي أحسن حال


بس أكيد إنتم عارفين إن غيابي عنكم خارج عن إرادتى


لأنى كنت مشغول جدا وخصوصا في الفتره الاخيره


بسبب الدراسه وكنت قليل لما بفتح النت


ودلوقتي أنا بفضل الله وبفضل دعواتكم نجحت ورجعت لكم من جديد


وإن شاء الله هحاول أرجع بقوة وأقدم مواضيع تعجبكم فى الفترة الجاية



بتمنالكم التوفيق دايما


كتبه/


الصيدلى المطحون


8 What Abdot You ?

موقـــــــــــــــف الحياه  

مرسلة بواسطة Abd-Alrahman


موقـــــــــــــــف الحياه
كلمة استنتجتها من ما قد حث لي في الايام الاخيرة
في هذه الايام فقدت عمي الاكبر
لقد توفاه الله اسال الله العظيم ان يفسح له في قبره وان يجهلع روضة من رياض الجنة
ولكن بعد مرور هذا الحدث بعدة ايام
تكشف لي امر غريب لم اكن اعرفه من قبل
اكتشفت ان من كان من اعز واغلي الناس علي و ان من كان اقربهم لي موة واخاء
ان من كنت احبه كثيرا وكم تحادثت معه وكم اقتبست من خبراته وكم علمني الكثير في الحياه
ان من ضحكت معه وجلست معه وقضيت الكثير والكثير من اوقاتي معه
اصبح مجرد موقف

فبعد ان كان دائما وجوده يملاء المكان وكلماته وتوجيهاته تحيط بنا
وبعد مع كان دائما معنا
اصبح الان لا يذكر الا في موقف من المواقف عند سردها
واصبح اسمه لا يمر في مجلس الا مرور الكرام
يمر ولا كانه مر
فهذا يحكي موقف من ذاكرته ويكون كنت بصحبه عمي رحمه الله
فمن الحاضرين من يقول رحمه الله عليه ومنهم من لا يقولها
واصبح بعد كل هذا مجرد موقف
فلا يتذكره احنا الا بوجوده في موقف او بكلمه او براي من ارائه التي كان ق فضها في موقف
عنها اكتشفت ان الانسان مهما طالت حياته
ومهما ارتفعت وعلت مكاناته
ومهما احبه من حوله ومهما كانوا معه لا يفارقونه

هوة مجرد موقف
فسياتي عليه يوم يكون فيه مجرد موقف
ولا يذكر الا بقول احدهم
(فلان الله يرحمه)
وعلي حسب هذا الموقف كان جميلا ام قبيحا كان عطوفا ام قاسيا
فكل من الجموع يتذكره بطريقته التي عرفه بها وتعامل مع علي اساسها
هاذه هيا الدنيا احبابي ك هي قصيرة وكم هي بسيطة
وما هي الا عة من المواقف
عليها تكون ذكري الانسان
بخير او بشر
وكل انسان من احبابك يذكرك بقدر ما قد اثرت داخله
وبقدر ما قد تفاعلت معه
ومن هنا اطلقت هذا العنوان علي تدوينتي الاخيرة
موقف الحياة
فكل منا له موقف مميز كلنا يتذكره به

فاعمل(ي) اخي واختي الحبيب (ة) علي ان يكون موقفك المميز دائما بخير

حتي تكون ذكراك طيبة وحتي يترحم عليك جميع من ذكرت عندهم


تحياتي

واسف جدا علي التاخير الشديد نظرا لظروف الامتحانات
اسالكم الدعاء لي وللفقيد بالرحمة وان يلهم اهله الصبر والسلوان
انه ولي ذللك والقادر عليه


كتبه الصيدلي المطحون

71 What Abdot You ?

حوار مع النفس  

مرسلة بواسطة Abd-Alrahman

وسالت نفسي حائرا ؟؟
انا من اكون ؟
انا من اكون ؟
مالي عشقت السير في طرق الظنون ؟
فإذ جنوني صار بعض تعقلي
واذا بافكاري يغلفها الحلول
انا من اكون ؟
انا من اكون ؟
ما بال بعض الناس صاروا ابحرا يخفون تحت الحب حقد الحاقدين ؟؟
يتقابلون باذرع مفتوحته والكره فيهم قد اطل من العيون
ياليت بين يدي مراه تري ما في قلوب الناس من امر دفين
انا .......... انا ........ انا
انا من اكون ؟؟
بيني وبين سعادتي بحر عميق
والناس حالوا بين قلبي والطريق
فلكم اعالجهم وبي سقم الضنا ولكم انجيهم وكنت انا الغريق
يارب ان ضاقت قلوب الناس عن مافي من خير فعفوك لا يضيق
يارب ان ضاقت قلوب الناس عن مافي من خير فعفوك لا يضيق
انا .......... انا ........ انا
انا من اكون ؟؟

82 What Abdot You ?

عيد فطر سعيد  

مرسلة بواسطة Abd-Alrahman


السلام عليكم ورحمة الله وبركاته
تحية طيبة وبعد
ازيكم يا كل المدونين
كل سنة وانتوا طيبين بمناسب عيد الفطر اعاده الله عليكم وعلينا بالخير واليمن والبركات
سبحان الله كنا من كام يوم بنقول رمضان جاي وسبحان الله في لحظات عدي ودلوقتي بنقول العيد جاي
اتمني لكل المدونين عيد سعيد ووقت ممتع ويارب تعود الايام ع الامة الاسلامية كلها بخير
وكانت اظرف الرسايل الي جاتلي ع الموبايل امبارح عشان تهنيني بالعيد
رسالة بتقول
قررت امانة الحزب الوطني تغيير (عيد مبارك )الي ( يا جمال العيد) نظرا للتغييرات الرئاسية القادمة
ضحكت عليها كتير الصراحة
والي ضحكتني اكتر بقي
رسالة تانية بتقول
عيد مبارك ونظيف وشريف
وكله سرور وكمال وجمال
مع تحيات الحزب الوطني
اسيبكوا بقي تستمتواع بوقتكوا
عســــــــــــــــــــــاكم من عــــــــــــــــواده

45 What Abdot You ?

وحان وقت الرحيــــــــــــــل  

مرسلة بواسطة Abd-Alrahman

وحان وقت الرحيل
تمر الايام والسنين في وقتها يكون شعورنا بها انا لن تمر ونشعر بطولها وصعوبتها ومرارتها
ولكنها في شريط الذكرايات تمر سريعة جدا جدا
ها انا الان في نفس المكان الذي كنت اقف فيه العام الماضي
ونفس البداية الي بدات بها وكان شيئا لم يكن
وكأن الوقت الطويل الذي مضي بكل صعوبة ومرارة
وتعب مضي في لمحة بصر
وهنا ادركت ان قطار الحياة يمر سريعا وان العمر لا ندركه الا بعد فواته
وعندها سمعت قول الله تعالي
بسم الله الرحمن الرحيم
(قال كم لبثتم في الارض عدد سنين * قالوا لبثنا يوما او بعض يوم فا اسال العادين)
صدق الله العظيم
وعلي الرغم من ذالك الا اننا لا نعي ما يحدث من حولنا في معظم الاوقات
ودائما يكون في مخيلتنا او في مخيلتي شخصيا
ان العمر ما زال طويلا وان الحياة مازات تفتح احضانها لي
ولكن بعد هذه التجربة
وهذه البداية تغير ما في مخيلتي تمام وادركت الواقع وعلمت اني بعد فوات العمر كله
سيمر علي شريط ذكراياتي سريعا كانه يوم او يومين

وها انا الان استعد اخوض التجربة ذاتها التي خضتها من قبل ولكن بائت بالفشل
متمنيا من الله تعالي ان يسدد خطاي في هذه المرة وان يوفقني وان يؤتيني خير هذا العام
ويكفيني شره انا وجميع المسلمين
ربنا اجعل عملنا مخلصا لوجهك الكريم وسلمه من الرياء والنفاق
واجعل كل اعمالنا فيما يرضيك وابعدنا عن سؤ الاعمال والاخلاق
امين يارب العالمين

تواجدي في لفترة القادمة سيكون قليل بسبب سفري الي اسيوط
اتمني من كل الزوار الدعاء لي بالتوفيق وانشاء الله مش هتاخر زي عادتي

تحياتي

42 What Abdot You ?

ضحــــكاية  

مرسلة بواسطة Abd-Alrahman

بعد دراسة جدوي دامت طول شهور عام 2008 طلعنا بنتايج
طبعا النتايج دي مش انا الي قولتها هيا جت لي في ايميل بس عجبتني اوي
قولت اضحككم معايا
خلينا مع النتايج
كيف تعرف أنك في عام 2008 ؟
واحد = تكتشف أن لديك خمسة عشر رقمًا هاتفيًا تخص أسرتك التي لا تزيد على ثلاثة أشخاص

اتنين = ترسل بريدًا الكترونيًا لزميلك في العمل الذي يجلس على مكتب مجاور لك.

تلاته = تتدهور علاقاتك بأفراد أسرتك أو أصدقائك ممن ليس لديهم بريد الكتروني.


اربعة = تقف بالسيارة تحت البيت ثم تتصل بالبيت بالموبايل لتطلب من يساعدك في حمل البقالة.

خمسة = كل إعلان في التلفزيون ينشر موقع إنترنت في أسفل الشاشة.

ستة = مغادرة البيت من دون أن تأخذ معك الموبايل – الذي لم تكن تستعمله طيلة عشرين أو ثلاثين عامًا من حياتك
تسبب لك الذعر فتعود لتأخذه
.
تمانية = تصحو في الصباح فتفتح الإنترنت قبل أن تشرب القهوة
.
تسعة = أنت الآن تقرأ هذا الكلام فتهز رأسك وتبتسم.

عشره = أنت مشغول جدًا لدرجة أنك لم تلحظ أن القائمة بلا رقم 7 .


احداشر = لقد حركت السطور لتتأكد من أنه لا يوجد رقم (7) فعلاً.

اتناشر = انا متأكد انك لو رجعت مرة أخري ستجد أن الرقم 7 موجود و انك لم تلحظه جيدا.

ثلاتشر -لقد حركت السطور مرة أخرى لتتأكد و مع ذلك لم تجد الرقم 7 طبعا أنا ضحكت عليك و هذا دليل على عدم ثقتك بنفسك و أنك تصدق أي كلام يقال لك

الآن أنت تضحك .. وترغب في إرسال هذه الرسالة إلى آخرين !

56 What Abdot You ?

هلت البشاير  

مرسلة بواسطة Abd-Alrahman



بعد طول غياب رجعت لكم تاني يا مدونين

وارجو ان محدش يكون زعلان مني

كنت برتب شوية حاجات كدة مع نفسي

عشان كدة اتاخرت عليكوا ودلوقتي رجعت

عشان اقول لكم

كل سنة وكل الامة الاسلامية بخير وسعادة

ويارب دايما الايام تمر ونحن في سعادة وسلام

اتمني من كل قلبي للامة الاسلامية ان تعيش بخير وسعادة وسلام

وكل الي زعلان ربنا يفرحه وكل الي عنده حرب ربنا يسلمة

ويحميه من كل شر

ويارب اشفي كل مريض

وحرر كل محتل

امين امين يارب العالمين
تحياتي لكم وكل عام وانتم بخير

وكان من اظرف الرسايل الي جتلي رسالة بتقول

غدا اول ايام رمضان وتم اعلان ذلك في الصعيد

حيث شوهد الهلال علي سيارةاسعاف

ههههههههه بصراحة ضحكت كتير عليها
تحياتي لكم جميعا

عبدالرحمن

49 What Abdot You ?

الفـــــــــــــــراق  

مرسلة بواسطة Abd-Alrahman

عيون باكية وخد مغمور بالدموع ويد باردة وقلب يكاد يتمزق من الحزن والخوف والشعور بالفراق
هكذا كان حالي عندما كنت اقف امام باب المطار
في هذا اليوم الذي ابتدي بالصمت من بزوغ الفجر الي غياب الشمس والصمت يخيم داخلي وفي كل مكان في منزلي وحتي داخل مخيلتي وفي افكاري
كانت اقسي كلمة سمعتها في ذاك اليوم عندما قالها لي والدي
(اشوف وشك بخير)
عندها كاد قلبي يتمزق ودمعت عيناي بغزارة وانا اودعه ثم ارتميت بحضنة وبكيت
مع انها ليست المرة الاولي ولا الثانية ولا حتي الخامسة
ولكن هذه المرة ينتابني شعور بالخوف واحساس غريب بالوحدة وتحمل المسؤلية
وكانت من اقسي الكلمات التي سمعتها في ذاك اليوم ايضا عندما وصاني علي اخوتي وعلي امي وترك في عنقي وعلي عاتقي مسؤلية صعب تحملها
ولم اكد اتحمل تلك اللحظات نعم لحظات الفراق المميتة
وبالفعل علمت ان اصعب احساس في الحياة احساس الفراق
دائما وابدا يمر في ثواني معدودة ولكنها مليئة بالاوجاع والالم
اشتقت اليك كثيرا يا ابي
فراغ كبير خلفته خلفك لا اطيق تحمله
اتمني من الله العلي الكريم ان يحفظ ابي ويحميه من كل اذي ومكروه
ويرده الي سالما من كل اذي
واتمني ان لا افارقه ابدا مرة اخري
واتمني ايضا ان لا اشهد انا وقلبي لحظة مثل تلك اللحظة المميتة
اسف علي غيابي ولكن لظروف خارجة عن ارادتي

77 What Abdot You ?

لحظة من التفكير  

مرسلة بواسطة Abd-Alrahman

اثار زيارتي لاحب مكان بالنسبة ليا
الي بشكي له همومي وبيسمعني
الي بفرح فيه وبكون في قمة السعادة
والي لما بزعل فيه بكون في قمة الحزن
المكان الي فيه اكتر ذكراياتي الجملية والحميمة
المكان الي بجد بجد انا بعشقة جدا جدا
الاسكندرية
بجد المكان دة اكتر مكان بحبه في مصر وكل سنة ليا فيه ذكرايات خاصة وجميلة
وتجارب وفسح وفرح وزعل وحوارات وجوابات
بس السنة دي بجد كانت زيارتي ليه مختلفة
انا لسة راجع من اسكندرية امبارح علي فكرة
بجد المكان دة السنة دي كان مختلف اوي اوي بالنسبة ليا
كان نقطة تغيير بجد للمود الي كنت فيه
مع اني مكنتش مصدق فكرة تغيير الجو دي
مع ان في بعض الحبايب نصحوني بيها كتير اوي عشان اطلع من المود الي كنت فيه
ولكن كنت مستمر في الخنقة الي كنت عاملها لنفسي في الاوضة بتاعتي من بعد الي حصلي
صحيح يا جماعة تقريبا معظم الي دخل مدونتي ورد علي تدوينتي الي فاتت كان بيسالني علي السبب الي مزعلني
وكان مخليني مكتئب من الدنيا كلها
وانا مكنتش قايلة لاني كنت خايف اوي منه لكن دلوقتي خلاص
انا مش خايف
السبب للاسف اني نزلت السنة دي في الكلية ومعايا 4 مواد من 12 مادة
علي العموم مش موضوعنا دلوقتي
لما روحت غيرت جو بجد اسكندرية السنة دي ادتني حاجات كتير مع اني كنت تقريبا هناك لوحدي
ولكن بجد ادتني الفرصة اني اقف مع نفسي وقفة كنت محتاجها اوي
وكمان بجد بعد الوقفة دي ثقتي بنفسي رجعت لي تاني بعد ما كانت للاسف خلاص اوشكت علي الموت كمان الامل جالي تاني مع اني كنت خلاص هحول من الكلية بتاعتي
ولكن دلوقتي انا عزمت علي تحدي نفسي ويا انا يا الكلية دي
بس بجد اتعلمت كتير من الوقعة دي مع اني كنت شايفها مصيبة كبيرة وحاجة كانت هتحطمني بجد
ولكن الحمد لله بفضل الله اولا وثانيا بفضل كل صحابي
حاولت اتعامل مع الموقف دة من زاوية تانية بجد خلتني اجمد واقوي بكتير من الاول
وهنـــــــــــــــــــا وقفت مع نفسي ورتبت اوراقي من جديد
واتعلمت ان كل حاجة وليها نظام
وامنت اوي بالمثل الي قال الي ميموتكش يقويك
وانا النهاردة بجد بعد ما صليت ركعتين شكر لله
بشكر كل المدونين واصحابي وحبايبي الي وقفوا معايا كلهم وشجعوني بكلامهم الجميل
وبشكر حبيبتي وروح قلبي الاسكندرية الي دايما معايا في كل مواقفي الحلوة والوحشة
وبجد الواحد عرف ان مفيش حاجة بتحصل اعتباطا كدة كل حاجة لحكمة يعلمها الله
وانا بجد اتعلمت الدرس كويس اوي وقفلت مكان الياس والاحباط في قلبي
وبشكر ربنا كتير اوي
اسف طولت عليكوا بغيابي بي اسكندرية كانت واخداني منكم
ملحوظة الصور من تصويري

64 What Abdot You ?

عودة .. ولكن محبطة ويائسة جدا  

مرسلة بواسطة Abd-Alrahman


السلام عليكم ورحمة الله وبركاته
بعد انقطاعي فترة كبيرة عن التدوين تقارب الشهرين
وللاسف كان لظروف الامتحانات وظروف تانية خارجة عن ارداتي
وبين قراري البعد واعتزال التدوين
وضغط بعض الاخوة المدونين عليا لحد ما رجعت
رجعت ولكن للاسف المرة دي مش زي كل مرة
كل مرة كنت بارجع مليان بالنشاط وحاسس بفرحة كبيرة
لكن المرة دي مش عارف الاحباط تملك مني بطريقة رهيبة
للاسف لما الواحد بيتعب اوي وبيجي علي نفسة اوي علشان خاطر حاجة معينة
ويستحمل تعب كبير اوي عشان الحاجة دي ويبذل مجهود كبير اوي فيها ويوقف كل حياته عشانها
وفي الاخر يلاقي ان كل المجهود والتعب الي تعبه وكل الي عمله بيضيع قدام عنية في لحظة
مع انه مقصرش الا في حاجات بسيطة
للاسف بيفقد كل حاجة وبيكره كل حاجة
وبيلاقي نفسة مش عايز يبذل اي مجهود تاني ولا عايز يتعب تاني علي الفاضي
وللاسف هوة دة الي حصلي
وانا من النوع الي مبيحبش كلام الشعارات وانت قوي واقوي من كدة ولازم تحاول تاني ومش عارف اية
بحس ان الي بيقولي كدة بيضحك عليا او بياخدني علي قد عقلي
للاسف اول مرة اجرب طعم الفشل في حياتي
و لاول مرة بفشل في حاجة مع اني مقصرتش فيها انا عملت كل الي قدرت عليه
وانا دايما مؤمن بان كل واحد بيتعب ربنا بيديلة علي قد تعبه
بس مش عارف اية الي حصل المرة دي حصل حاجة مش قادر احددها
وللاسف من ساعتها وانا عايش في جو صعب عمري ما دخلته ولا عشت فيه
بل بكرهه حالة نفسية صعبة منعزل منطوي علي نفسي
كل الي حواليا لاحظوا التغيير كله حاول معايا بس للاسف مش عارف
شكلي رايح في نوبة وهطول شوية
وهيا كدة الدنيا لما بتزعل حد بتزعله اوي ولما بتاخد من حد حاجة بتاخد منه اعز حاجة بيحبها وبيمتلكها
وللاسف هيا خدت مني اكتر من كدة
اخدت مني الامل بتاعي كمان وخلتني عاجز عن اني اكمل تاني وكل فترة بتسود الحياة اكتر
اتمني من كل الي يزورني انه يدعيلي
وانا هحاول اني اكتب تاني في الفترة دي ولكن لو اتاخرت تاني ياريت الكل يعذرني

90 What Abdot You ?
Older Posts